विराटनगरमा ४२ सहित प्रदेश १ मा थपिए ७० जना कोरोना संक्रमित

भदौ ७, विराटनगर –
प्रदेश राजधानी विराटनगरमा आइतबार ४२ जना कोरोना भाइरसका संक्रमित थपिएका छन्। विराटनगरमा थपिएका ४२ जना मध्ये १८ महिला र २४ पुरुष छन् । यस्तै प्रदेश १ भित्र आइतबार ७० जना संक्रमित थपिएका छन् । थपिएकामा २७ महिला र ४३ पुरुष छन् ।

जसमा मोरङमा ५०, झापामा १०, सुनसरीमा ९ र प्रदेश १ बाहिरका एक जनामा कोरोना संक्रमण पुष्टि भएको सामाजिक विकास मन्त्रालयले जनाएको छ ।

प्रदेश १ मा आइतबार ८०५ जनाको पीसीआर परीक्षण भएकोमा ७० जनाको रिपोर्ट पोजेटिभ आएको हो । प्रदेश १ मा हालसम्म कोरोना संक्रमितको संख्या २ हजार ६५९ पुगेको छ ।

प्रदेश १ मा आइतबार उपचारपछि कोरोना जितेर २५ जना डिस्चार्ज भएका छन् । योसँगै प्रदेश १ मा डिस्चार्ज हुनेको संख्या एक हजार २६७ पुगेको छ । हाल सम्म ७७ हजार १५६ जनाको पीसीआर परीक्षण भएको सामाजिक विकास मन्त्रालयले जनाएको छ ।