भदौ २४, विराटनगर –
युवा अभियन्ता ओसिम आलमको नेतृत्वको टिमले एकजना क्यान्सर पीडित महिलालाई सहयोग गरेको छ । आलम नेतृत्वको समूहले रंगेली नगरपालिका २, बबियाबिर्ता निवासी स्तन क्यान्सर पिडित मन्दिरा गुरुङलाई खाद्यान्न सहयोग गरेको हो ।
पत्रकार विरेन्द्र कुमार साहले पीडितको परिवारमा पछिल्लो समय खान नै मुस्किल भएको थाहा पाएपछि अभियन्ता आलमको सहयोगमा खाद्यान्न उपलब्ध गराईएको हो । चामल, नुन, तेल, आलु, स्वयबिन, दाल, चाउचाउ , चिउरा लगायतमा खाद्य सामाग्री सहयोग गरेको आलमले बताए । पिडित गुरुङ पत्रकार शाहको पहलमा नेपाल क्यान्सर अस्पताल हरिसिद्दिमा एक बर्ष उपचारपछि क्यान्सर जितेर घर फर्किएकि हुन् । 
६ महिनाअघि घर फर्किएकी उनको परिवारको आर्थिक स्थिति कमजोर छ । घर फर्किएपछि कोरोना भाइरसका कारण लकडाउन भएकोले रोजगारी समेत नभएपछि खानकै लागि मुस्किल भएको गुरुङले बताईन् । मन्दिराको घरमा दुई जना अपांग बच्चा सहित ८ जना रहेका छन् । पीडित परिवारलाई पत्रकार शाहको पहलमा अभियन्ता आलम र उनको निशुल्क खाना खुवाउने अभियानको समुहले गरिब २ महिनालाई पुग्ने खाद्यान्न सहयोग गरेको हो ।
युवा सामाजिक अभियन्ता आलमले यो दुखको बेलामा एक अर्कालाई सकेको मलहम लगाउनुपर्ने बताए । उनले भने, ‘सकेको सहयोग गर्नुपर्छ, यो नै हाम्रो मानवता हो। अहिले राजनीतिका कुरा छोडौ ,राजनीतिक स्वार्थलाई छोडेर सबैजना मिलेर निभेको चुलो बाल्न सहकार्य गरौ ।” आलमको नेतृत्वमा विराटनगरमा विगत १०० दिनदेखि सडक पेटिमा बस्नेहरुलाई निशुल्क खाना खुवाउने अभियान चलिरहेको छ ।
