असोज ३, विराटनगर –
आजबाट विश्वकै महँगो र चर्चित क्रीकेट लिग इन्डियन प्रिमियर लिग (आइपिएल) २०२० सुरु हुँदैछ । कोरोना भाइरसले पाँच महिना धकेलिएको आइपिएल भारतमा कोरोना संक्रमण लगातार बढेपछि सिजनको आइपिएल युएईमा हुँदैछ ।
पहिलो खेलमा आज शनिबार मुम्बइ इन्डियन्स र चेन्नई सुपरकिंग्स भिड्दैछन् । खेल नेपाली समयअनुसार राति पौने ८ बजेबाट सुरु हुनेछ । दुवै टिम आइपिएल इतिहासका सबैभन्दा सफल टिम हुन्।
आइपिएलको सर्वाधिक विजेता मुम्बईले अहिलेसम्म चार पटक उपाधि जितेको छ। यस्तै चेन्नई तीन पटक च्याम्पियन बनेको छ।
गत सिजन उपविजेतामा सीमित भएको चेन्नई आइपिएलको हरेक संस्करणको अन्तिम चारमा पुगेको छ।
यसपटकको आइपिएलका लागि खेलाडी,अफिसियल लगायतले स्वास्थ्य प्रोटोकल पालना गर्नुपर्नेछ। दुबई, सारजाह र अबुधावीमा हुने खेलका दौरान रंगशालामा दर्शकलाई प्रवेश निषेध गरिएको छ। सबै खेलाडीलाई आफ्नो टिम होटल छाड्न बन्देज लगाइएको छ।आइपिएलका राउन्ड रोबिनका खेल युएईको तीनमा स्थानमा हुनेछन्। जसअनुसार अबुधावीमा २० खेल, दुबईमा २४ खेल र सारजाहमा १२ खेल हुनेछन्।
मुम्बई र कोलकताले समूह चरणका ८ खेल अबुधावीमा खेल्ने तय छ। यस्तै सनराइजर्स हैदरावादले ८ खेल दुबईमा खेल्ने तय छ।
यस्तै चेन्नई सुपरकिंग्स, किंग्स ११ पञ्जाव, दिल्ली क्यापिटल्स र रोयल च्यालेन्जर्स बेंग्लोरका ७-७ खेल दुबईमा छन्। राजस्थान रोयल्सको ६ खेल दुबई, पाँच खेल अबुधावी र तीन खेल सारजाहमा छन्।
आइपिएलमा यसपटक पनि नेपालका युवा लेगस्पिनर सन्दीप लामिछाने दिल्ली क्यापिटल्सबाट खेल्दैछन्।
