असोज ९ –
इन्डियन प्रीमियर लिग (आईपीएल) मा गएराती भएको खेलमा रोयल च्यालेन्जर ब्यांग्लोरले लज्जास्पद हार बेहोरेको छ । पहिलो खेलमा सनराइजर्स हैदरबादलाई हराएको ब्यांग्लोर दोश्रो खेलमा भने किङ्ग्स इलाभेन पञ्जावसँग ९९ रनले पराजित भएको छ ।
आइपिएलकै सबैभन्दा महङ्गा खेलाडी ब्यांग्लोरका कप्तान विराट कोहली चल्न नसक्दा ब्यांग्लोरले लज्जास्पद हार बेहोर्नुपर्यो । एकातिर किंग्स इलेभन पञ्जावका कप्तान लोकेश राहुलले रन बनाउनको लागि लगातार छक्का प्रहार गरिरहे भने अर्कोतिर ब्यांग्लोरका कप्तान विराट कोहलीले उनलाई दुई पटक क्याच छुटाएर खेल्न मौका दिईरहे ।
राहुलले बिस्फोटक ब्याटिङ गर्दै ७ छक्का र १४ चौकाको सहयोगमा ६९ बलमै नट आउट १३२ रन बनाए । १७ ओभरको अन्तिम बलमा विराटले बाउन्ट्रीमा राहुलको क्याच छोडेका थिए । त्यस्तै अर्को क्याच विराटले नै १८ औँ ओभरको अन्तिम बलमा बाउन्ट्रीमै क्याच मिस गरे । आईपीएलमा दोश्रो शतक हानेका राहुलले यो सिजनको भने आइपिएलकै पहिलो शतक रहेको छ । ३ विकेटको क्षतिमा निर्धारित २० ओभरमा पञ्जावले २०६ रन बनाएको थियो ।
जवाफी ब्याटिङमा उत्रिएको ब्यांग्लोरले १७ ओभरमा अलआउट हुँदै मात्र १०९ रन बनाएको थियो । ब्यांग्लोरको हारमा कप्तान विराट कोहोली नै मुख्य पात्र बने । एकातिर दुई क्याच छुटाएर विपक्षीलाई धेरै रन बनाउने मौका दिएभने अर्कातिर आफुले मात्र १ रन बनाएर टिमलाई हारका लागि सहज बनाईदिए । रन मेसिनको उपमा पाएका कोहलिले यसअघिको खेलमा पनि रन बनाउन सकेका थिएनन् ।
