असोज ९, जनकपुर –
चीनले नेपाली भूमि अतिक्रमण गरेको भन्दै जनकपुरमा युवाहरुले विरोध प्रदर्शन गरेका छन् । शुक्रबार जनकपुरमा चीनले हुम्लामा नेपाली भूमि अतिक्रमण गरेको भन्दै अतिक्रमणबिरुद्ध युवा नेपाल समितिले विरोध प्रदर्शन गरेको हो ।
युवा नेपाल समिति प्रदेश २ को आयोजनामा भएको विरोध प्रदर्शन रामानन्द चोकबाट शुरु भएर जनक चोकमा पुगि कोणसभामा परिणत भएको थियो । समितिका प्रदेश २ अध्यक्ष मोहन सिंहको अगुवाईमा निस्केको विरोध र्यालीमा युवाहरुले ब्याक अफ चाइना, चिनियाँ अतिक्रमण बन्द गर, मिचिएको नेपाली भूमि फिर्ता गर, चाइनिज साम्राज्य मुर्दावाद लगायतका नाराहरु लगाएका थिए । युवाहरुले परराष्ट्रमन्त्री प्रदीप ज्ञवालीबिरुद्ध समेत नारा लगाएका थिए ।
केही दिनअगाडी मात्रै नेपालको हुम्ला जिल्लास्थित ल्याप्चामा चीनले नेपालि भुमिमा भवन बनाएको भनेर समाचार बाहिरिएको थियो । यद्यपि, नेपाल सरकारले नेपाली भूमिमा चीनको तर्फबाट अतिक्रमण नभएको स्पष्ट पारिसकेको छ ।
