चैत्र २, काठमाडौ –
नेकपा एमालेका बरिस्ठ नेताद्वय माधव नेपाल र झलनाथ खनाल समूहले प्रधानमन्त्री केपि शर्मा ओलिले ३ गते बालुवाटारमा गर्ने चियापान कार्यक्रम बहिस्कार गर्ने भएका छन्। साथै माधव-झलनाथ समूहले चैत ४ र ५ गतेको राष्ट्रिय कार्यकर्ता भेला पनि नरोक्ने भएको छ ।
धुम्बाराहीमा पार्टी अध्यक्ष एवम् प्रधानमन्त्री केपी ओलीसहितका नेताहरूसँगको छलफलपछि नेकपा एमालेको माधवसमूहले बानेश्वरस्थित अर्याल होटलमा गरेको केन्द्रीय सदस्य र सांसदहरुको भेलाले राष्ट्रिय कार्यकर्ता भेला नरोक्ने निर्णय गरेको हो।
यसैबीच मंगलबार अध्यक्ष ओलीले बालुवाटारमा चियापान कार्यक्रमका आयोजना गरेपनि माधव समूहका नेताहरु उक्त चियापानमा नजाने भएका छन् । ओली बोलाएको चियापानमा आफ्नो समूहका कोही पनि नेताहरुलाई नजान निर्देशन दिइएको बैठकमा सहभागी एक नेताले जानकारी दिए।
भेलामा वरिष्ठ नेता माधवकुमार नेपालले पार्टी कार्यालय धुम्बाराहीमा दुईपक्षबीच भएको छलफलको विषयबारे जानकारी गराएका थिए। ओलीसँगको छलफल निस्कर्षमा नपुगेकाले कुनैपनि कार्यक्रम नरोकिने निर्णय नेपालले बैठकमा सुनाएका थिए।
नेपाल पक्षले ओलीसँग फागुन २८ गते ओली पक्षले गरेको नेपाललगायतका पदाधिकारी हटाउने एकलौटी निर्णय खारेज हुनुपर्ने र त्यसपछि मात्र छलफल अघि बढ्ने अडान राखेका थिए। फागुन २८ को निर्णय फिर्ता भएपछि मात्र थप वार्ता हुने नेपाल समूहले जनाएको छ।
एमालेको पार्टी कार्यालयमा भएको बैठकमा प्रधानमन्त्री ओलीसहित ईश्वर पोखरेल, विष्णुप्रसाद पौडेल, प्रदीपकुमार ज्ञवाली र सुवास नेम्वाङ सहभागी भएका थिए। अर्को समूहबाट नेपालसहित भीम रावल, सुरेन्द्र पाण्डे, घनश्याम भूसाल, र रघुजी पन्तलगायत सहभागी थिए।
