जारी युरोकप फुटबलमा सेमिफाइनल समीकरण पूरा भएको छ। गएराती भएका दुई खेलसँगै सेमिफाइनल समीकरण पूरा भएको हो ।
क्वाटरफाइनलको खेलहरुमा स्पेनले स्वीजरल्याण्डलाई पेनाल्टी सुटआउटमा हराउँदा इटलीले बेल्जियमलाई २-१ गोलअन्तरले स्तब्ध पार्यो । त्यस्तै डेनमार्कले चेक रिपब्लिकलाई २-१ गोलअन्तरले हराउँदा इङ्ग्ल्याण्डले युक्रेनमाथि ४-० को फराकिलो जित निकाल्यो।
समूह ‘ई’ को उपविजेता हुँदै अन्तिम १६ प्रवेश गरेको स्पेनले क्रोएसियालाई ५-३ गोलअन्तरले हराउँदै क्वाटरफाइनलमा प्रवेश गरेको थियो। त्यस्तै क्वाटरफाइनलमा स्वीजरल्याण्ड लाई पेनाल्टी सुटआउटमा हराउँदै स्पेनले सेमिफाइनलमा स्थान सुरक्षित गरेको हो।
समूह ‘ए’ को विजेता इटलीले अन्तिम १६ मा अस्ट्रियालाई २-१ ले हराउँदै क्वाटरफाइनलको यात्रा तय गरेको थियो। क्वाटरफाइनलमा विश्व वरीयताको शीर्ष स्थानमा रहेको बेल्जियमलाई २-१ ले हराउँदै इटलीले सेमिफाइनलमा स्थान बनाएको थियो।
समूह चरणमा सुरुवाती दुई खेल गुमाएर पनि समूह ‘बी’ को उपविजेता बनेको डेनमार्कले अन्तिम १६ मा वेल्सलाई हराएको थियो। त्यस्तै क्वाटरफाइनलमा चेक रिपब्लिकलाई हराउँदै सेमिफाइनलमा स्थान सुरक्षित गरेको हो।
यस्तै , समूह ‘डी’ को विजेता इङ्ग्ल्याण्डले अन्तिम १६ मा जर्मनीलाई हराएको थियो भने क्वाटरफाइनलमा युक्रेनलाई ४-० को फराकिलो अन्तरले हराएको थियो। यो सँगै १९९६ पछि इङ्ग्ल्याण्ड पहिलो पटक सेमिफाइनलमा प्रवेश गरेको हो।
अब सेमिफाइनलका खेलमा स्पेन र इटलीबिचको खेल जुलाई ७ बुधवार बिहान पौने १ बजे हुनेछ। त्यस्तै डेनमार्क र इङ्ग्ल्याण्डबिचको खेल जुलाई ८ बिहान पौने १ बजे हुनेछ।
