काठमाडौ – नेपाल र भारतबिचको मैत्रीपुर्ण फुटबल खेल आज हुँदैछ। खेल त्रिपुरेश्वरस्थित दशरथ रंगशालामा आज साँझ ५ बजे सुरु हुनेछ।
साफ च्याम्पियनसिप र एसिया कप छनोटको तयारीमा रहेका नेपाल र भारतीय फुटबल टोलीबीच दुई मैत्रीपूर्ण खेल हुन लागेको हो ।अर्को खेल आइतबार हुनेछ।
हालसम्म नेपाल र भारतबीच १९ वटा खेल भएको छ जसमा भारतले १३ खेल जित्दा नेपालले दुई खेल जितेको छ भने बाँकी ४ बराबरीमा रोकिएको छ। इतिहास जस्तो भए पनि आफूहरुले राम्रो तयारी गरेकाले बराबरीका लागि नभएर जितका लागि खेल्ने नेपाली टोलीका प्रशिक्षक अब्दुल्लाह अलमुताइरीले प्रिम्याच कन्फ्रेन्समा बताए।
त्यस्तै भारतीय टोलीका कप्तान सुनिल क्षेत्रीले नेपालसँगको प्रतिस्पर्धा सहज नहुने प्रतिकृया दिए। त्यस्तै भारतीय टोलीका प्रशिक्षक इगोर स्टिमाकले साफको तयारीको रुपमा लिएको बताए। उनले आफ्नो तयारीलाई लिएर सबै कुराहरु आदर्श नभएको प्रतिकृया दिए।
राष्ट्रिय टोलीका कप्तान किरण चेम्जोङले २ महिनाको तयारी भएको भन्दै साफ अघि घरेलु मैदानमा मैत्रीपूर्ण खेल खेल्न पाउनु राम्रो भएको बताए। खेलको प्रत्यक्ष प्रसारण हिमालय टीभी र युट्युब च्यानल ओएसआर स्पोर्ट्सले गर्नेछन्।
