मोरङका सबै मतदानकेन्द्रमा मतदान सम्पन्न भएको छ । मतदान सम्पन्न भएसँगै मतपेटिका संकलनको काम सुरु भएको मोरङका प्रमुख जिल्ला अधिकारी काशीराज दाहालले जानकारी दिए ।
८३९ वटा मतदान केन्द्र र ३०६ वटा मतदानस्थल रहेको मोरङमा साँझ ५ बजेसम्म ६३ प्रतिशत मत खसेको प्रदेश निर्वाचन कार्यालय मोरङका प्रमुख लेवन काश्यप अधिकारीले बताए । खसेको मतको प्रतिशतको अन्तिम विवरण आइसकेको छैन । अझै प्रतिशत बढ्नसक्ने उनले बताए ।
जिल्लामा ७ लाख ३५ हजार ५२५ मतदाता रहेका छन् । ६ जना अन्य मतदाता रहेका निर्वाचन कार्यालयले जनाएको छ । ६ वटा प्रतिनिधिसभा र १२ वटा प्रदेशसभा निर्वाचन क्षेत्र रहेको मोरङमा मतदान सकिँदा सम्म ६५ प्रतिशत मत खस्ने अनुमान गरिएको छ । निर्वाचन आयोगले आइतबार रातिदेखि नै मतगणना गर्न भने पनि मोरङमा भने कति बेलादेखि मतगणना गर्ने भन्ने अन्योल छ ।
सर्वदलीय बैठकको निर्णय अनुसार मतगणना गर्ने जनाइएको छ । सर्वदलीय बैठक आज राति नै बस्नेछ । मोरङको १ नम्बर क्षेत्रमा भौगोलिक विकटताका कारण मतपेटिका आउन समय लाग्न जनाइएको छ ।
मोरङ जिल्लामा कुन क्षेत्रको मतगणना कहाँ ?
क्षेत्र नम्बर १ उर्लाबारी नगरपालिका भवन, उर्लाबारी
क्षेत्र नम्बर २ विश्वनाथ मन्दिर रतुवामाई
क्षेत्र नम्बर ३ भगवती मावि, बेलबारी
क्षेत्र नम्बर ५ आदर्श मावि, विराटनगर
क्षेत्र नम्बर ६ आदर्श मावि, विराटनगर
